疫苗可預防疾病科學委員會主席，港大兒童及青少年科學系講座教授 劉宇隆 教授——冀農曆年前後 再多30萬70歲以上長者接種第一劑疫苗
＊標題由編輯所加
致2022年港大醫科畢業生:
轉眼又快到你哋完成六年醫科課程嘅日子，喺過去10個月嘅兒科課程中，同你哋一齊渡過香港應付新冠疫情嘅艱辛歲月，感受良多。因為今年七月你哋都會成為醫生，走在最前線，為市民服務，所以我過去10個月盡量使到你哋落手做醫生會做嘅嘢，以便學以致用。並且學會獨立評估瞬息萬變的資訊，向病人作適當輔導及推介。當然我用新冠疫苗作為這種教學的切入點，係要訓練你哋用正反兩方來思考問題，避免偏頗。新冠疫苗嘅資訊，變化萬千，尤其是變異病毒株不斷出現，增加學習嘅可能性，明白知識是天天新，要不懈努力。 Omicron喺過去兩個月席捲全世界，更是學習的良機。
你哋可記得，我將你哋每組學生分為正反兩邊，然後辯論以下三個關於新冠疫苗嘅問題。第一是打還是不打新冠疫苗，第二是打復必泰還是科興，第三是打還是不打加強劑。當然辯論前，我已電郵給你們一些基本資料，包括我向不同醫學組織及學校老師家長嘅講解錄音，當然你哋亦學會自己上網搵最新嘅訊息。
喺辯論嘅過程，你哋學到所有事情都要睇正反嘅意見，學會明白體諒同你持相反意見嘅人。就好似點解咁多人，尤其是70/80歲嘅老人家唔願意打疫苗，我哋要明白佢哋嘅憂慮困難，幫助佢哋克服障礙。唔肯打疫苗嘅原因眾多，好似擔心副作用，又覺得自己一把年紀，百病纏身，街都唔去，不打也罷; 但最近Omicron喺社區傳播得好厲害，還感染到老人家年幼嘅孫仔孫女，要入醫院，似乎又啟動不少老人家去打疫苗嘅動力。
至於打邊隻疫苗，你哋亦明白全世界冇幾多地方好似香港咁，可以任由市民選擇打邊隻。喺辯論過程中，你哋明白復必泰及科興疫苗都通過世衛批核，兩隻疫苗都有其好處及不足之處，復必泰能引發比較高嘅抗體濃度，但亦因而有較多不良反應，包括心肌炎，尤其是青少年男生，接種第二針有較高發生機會，所以打針後需要休息，不能運動一周。相反科興引發嘅抗體濃度比較低，但亦因此比較少不良反應，完全無心肌炎嘅風險。你哋要學識向市民耐心解說，俾佢哋自由選擇打邊隻疫苗。尤其是係Omicron主宰嘅時代，要耐心解說疫苗嘅主要功能係預防重症及死亡，最終打邊隻疫苗都不能有效預防感染Omicron，但兩隻疫苗都可以引發T細胞反應，大大減少重症及死亡。所以主要訊息是未打針嘅市民應盡量快打，打邊隻都可以，尤其係有五十多萬位 70歲以上嘅長者還未打第一針，如不幸感染，引發重症及死亡的機會比已打針嘅長者，多10幾20倍。我希望在農曆年前後，再有30萬70歲以上長者能打到第一針，以應對Omicron喺社區未來幾個星期大規模傳播嘅風險。
至於加強劑，在辯論中，你哋都明白基本完成接種，復必泰是兩針，科興是三針，因為科興引發嘅抗體濃度比較低，所以三針後才算完成基本接種。故加強劑係第幾針係視乎邊隻疫苗。但係Omicron嘅出現，已使到大家明白不論打加強劑與否，最後都會感染Omicron，即係打兩針或三針復必泰或科興都會受感染，所以我哋應向市民耐心解說打針係預防重症及死亡，我哋冇可能永續用加強劑去防止感染，因為接種了第三針復必泰防止感染Omicron嘅抗體，在兩三個月已經降低到不能防止感染。所以社會要學曉聚焦預防重症死亡才是走出大流行嘅方向，與病毒共存的大前提是提高疫苗接種率至全民，從而將新冠肺炎原先兩個百分點嘅死亡率，減低到千分之一以下，咁樣就唔會壓垮醫療系統，社會及經濟活動都有機會復常。香港便具備新冠肺炎由大流行轉為風土病嘅條件。
最後我要提醒大家，今日非洲有八成以上嘅人都未打第一針，所以地球村係唔會步出大流行，因為好快會喺非洲出現另一款變種新冠病毒，可能唔止比Omicron更具傳染力，還更高致病性，Omicron是上天給我們一個結束大流行的機會，這機會轉眼即過，所以我哋一定要幫非洲嘅兄弟姊妹盡快打針，我哋不好再計劃打第四針，每日食三餐已是足夠，應該比非洲嘅人食第一第二餐。 同學們，互勉之。
劉宇隆
2022年1月15日
【聲音完全版】
香港電台第一台FM92.6 - 94.4星期六早上九點至九點二十分
主持：陳顥之、張鳳萍
編導：陳顥之、張鳳萍
監製：林嘉瑜
學者、議員、官員及社會人士透過書信形式，分析社會現象，細訴個人感受。
