各位親愛嘅醫學院同學，
上星期我喺兒科專科門診，為一位六歲小朋友「明仔」覆診。佢喺一個月之前，因為患上流感併發急性肺炎，導致呼吸衰歇而要入住深切治療部。明仔一向患有哮喘，但從來無接種過流感疫苗。我同明仔嘅媽媽都很欣慰佢目前情況逐漸康復，但肺功能尚有待慢慢改進。當我向媽媽提議幫明仔接種「季節性流感疫苗」，明仔媽媽當下極之反對。佢提出很多網上見到針對流感疫苗嘅錯誤資訊同繆誤：例如流感疫苗接種後嘅不良反應、質疑流感疫苗嘅保護能力，唔理解咩係三價、四價流感疫苗等，我花咗好一段時間同佢作解說同討論!
呢個同病人家屬討論嘅體驗，令我有感而發，希望藉此「家書」抒發我個人意見、經驗同感受，同大家分享。
我們醫護喺呼籲市民接種流感疫苗，務必要提及到感染流感嘅風險，同埋接種流感疫苗嚟預防流感嘅重要性。香港上季度嘅流感季節喺七月下旬先至結束，持續長達28周 ，大大增加高危人群感染嘅風險。長者、小童、孕婦、長期病患人士 (例如明仔患有哮喘) 以及醫護人士等，都係流感高危感染群組。倘若感染流感，有機會衍生併發症，例如鼻竇炎及耳部感染、肺炎、心肌炎、急性腦炎、敗血症及多重器官衰竭等等，嚴重病情可引致死亡。
作為兒科醫生，亦要向兒童同家長解釋，每年接種季節性流感疫苗係其中一種預防流感及其併發症嘅有效方法，可以減低因為患流感而入院留醫，同死亡嘅機會。流感疫苗接種後嘅反應普遍輕微。根據海外嘅研究顯示，兒童接種流感疫苗可以減少缺課同流感喺社區嘅廣泛傳播。每個流感季節主要流行嘅病毒都唔同，而且流感病毒會不停變化，然而，每個人嘅免疫力也會隨著年紀及時間下降。因此，每年接種流感疫苗係保護自己免受流感病毒感染嘅最佳方法。
有賴香港衞生署嘅努力，數據顯示，季節性流感疫苗接種計劃嘅接種數字錄得新高，較2022至2023季度增加約20%。不過可惜嘅係，2023至2024年度流感季節共錄得33宗兒童重症及死亡嘅個案，當中只有大約百分之25已經接種季節性流感疫苗。反映疫苗接種計劃嘅推廣有成效，但仍然需要加大力度推高兒童接種率，加強群體免疫力，尤其係幼兒高危一族。
明仔媽媽問到：「咩是三價、四價流感疫苗？有咩分別？四價是否比三價有效?」根據世界衛生組織資料顯示，自2020年3月，已經無檢測到關於”B/Yamagata” 「乙型山形株」譜系嘅病毒。 因此，世界衛生組織流感疫苗成份委員會，已經喺2023年年底，建議唔需要喺流感疫苗成份中包含B/Yamagata「乙型山形株」譜系，2024-2025年北半球流感季可接種三價流感疫苗。歐洲藥品管理局早前亦發出建議，可以由四價疫苗，轉用為不含B/Yamagata「乙型山形株」 成分嘅三價疫苗。事實上，三價、四價流感疫苗同樣能夠有效預防到流感病毒感染。目前本港已經引入「三價減活噴鼻式」及「四價滅活針劑」流感疫苗為合資格人士接種。兩款適用嘅年齡不同，「三價減活噴鼻式」流感疫苗適合2至49歲健康及沒有懷孕人士；「四價滅活針劑」流感疫苗就適合六個月以上健康或患有慢性疾病人士接種。
除咗香港以外，噴鼻式減活流感疫苗已經喺不同嘅地區，包括美國 、英國 ，芬蘭 等地區使用。 由於噴鼻式減活流感疫苗模仿經鼻子感染流感病毒嘅自然過程，嚟產生對抗流感嘅免疫力，接種過程快速、無痛，能夠避免學童打針前同打針時出現嘅恐懼、大哭大鬧嘅情況，有助幫助學童身體建立第一道防線。
今年，為咗加強防疫，各項季節性流感疫苗接種計劃已於九月中展開。為提高學童流感疫苗嘅接種率，當局致力推廣季節性流感疫苗學校外展計劃，參與度持續創新高，但仍然有提升空間，關鍵在於家長有沒有掌握到足夠資訊，以及喺校園推廣模式。我們醫學界好開心見到當局今年實施新特別安排，允許幼稚園同幼兒中心，可以於同一或不同嘅外展活動自由選擇「三價減活噴鼻式」流感疫苗或「四價滅活針劑」流感疫苗進行接種 。衞生署亦推行先導計劃，首次為有意安排中、小學生接種減活噴鼻式流感疫苗，有望提升學童流感疫苗接種率。
科學證據顯示，患者如同時間感染流感、新冠及常見呼吸道病毒，較多機會有肺炎或嚴重呼吸系統感染，病情會比較嚴重。所以同學們除咗要呼籲市民接種流感疫苗預防流感以外，亦需要提醒巿民儘快完成接種新冠疫苗，以預防新冠同流感病毒 「雙疫夾擊」，減低患重症、住院及死亡嘅機會。
作為醫生，我哋要教導家長一旦發現病童感染流感、新冠，或其他呼吸道病毒後持續發高燒、呼吸困難、嘴唇發紫、心口痛、心跳加速、神智突然轉變或模糊、進食困難或有抽筋跡象等徵狀，應該馬上帶小朋友前往急症室，或召緊急救護車送院。
我勸勉每位醫學生：我哋每天面對嘅都是寶貴嘅生命，應視每位病人好似至親咁，用心好好嘅對待佢哋，每個兒童都需要受到適切嘅照顧及保護，包括預防各種傳染病。我哋對家長都要耐心聆聽、不厭其煩地分析同解說接種季節性流感疫苗嘅好處及重要性。
你哋係唔係好想知道明仔媽媽最後決定係點？
我终於說服到明仔媽媽讓明仔接種流感疫苗。因為明仔年紀細過九歲同埋第一次接種，需要相隔四星期接種兩針。最高興嘅係，明仔媽媽亦會幫三歲弟弟接種噴鼻式流感疫苗！
我亦叮囑各位香港市民，現時新冠病毒感染仍然肆虐，此外，流感季節將至，家長應該及早帶兒童接種季節性流感疫苗同新冠疫苗，以減低患併發症同重症機會。如果家長對疫苗接種有任何疑問，應該向家庭醫生查詢，並選擇合適嘅疫苗幫自己、家中嘅小朋友同老人家接種。
祝大家身心健康！
關日華醫生
2024年11月16日
香港電台第一台FM92.6 - 94.4星期六早上九點至九點二十分
編導：陳健佳
監製：林嘉瑜
學者、議員、官員及社會人士透過書信形式，分析社會現象，細訴個人感受。
